ग़ज़ल

बसोंदे ता असां पल भर कुथी जे रुख हरा मिलदा।
असां भी जीण जी लैंदे, जे साथी इक खरा मिलदा।
**
रिह्या मितरो बची मैं तां, जे नाइये गैं था इक्क  कैंचु।
करी छडदा सै टिन्ड मेरी , जे तीह्जो उस्तरा मिलदा।
**
बड़े मद्धरे नि चा:ह्यीदे ए भत्त जिन्दू दा खाणे जो
नपी दिन्दा छड़ोह्ली मैं जे   खट्टा चरभरा मिलदा।
**
नि मिली बे:ह्ल ही मुंज्जो दुखां गिणने ते ही मितरो।
रिह्या सुख भ्याख्दा मैं भी  कदी तिसने जरा मिलदा।
**
मैं गुत्थदा झग्गुये तां:ह् ते,   छकोंदा होर भी तुआंह् ते
गयी बीत्ति एह जिंद सोच्चैं,  कोई झग्गू  खरा मिलदा।
**
मत उडदे पंछिया पर बाह बँदूकां रैह्म कर  किछ ता
तू दिख खोहड़ी ने हिक्का मेरिया  इक इक छरा मिलदा।
**
मैं हथ लाह्या दा दस कुस खोतिया, बनोह्ये एह  मेरे गोड्डे।
मैं पुछदा तिज्जो पकड़ी   जे मेरे  परमेसरा मिलदा।
**
नि दित्ता  दोस्त मैँ जाणा, बुराईयां दे चभच्चे विच्च।
रुस्सी बैठेया हण दस्सा, खरा कर्देयाँ बुरा मिलदा।
**
इह्नां लतरोंदींयाँ जीभां दी मुंज्जो पै:ह्ले ते सू:ह् थी।
छड्डीन्दे  गाईं  खुहलियाँ सैह जे खेत्तर हरभरा मिलदा।
**
चुक्की भरेया घड़ा मूँ:ह्डें,  चल्ली लैणा मैं सौ कोह भी।
पट्टोंन्दी इक्क भी गैं नि जे घड़ा अद्धभरा मिलदा।
**
कुर्सिया आळे-दुआळे घिरयो तळीयां चट्टणे आळे।
इन्हां छछूंदरां  पुच्छा तिन्हां कुण मुरमुरा मिलदा।
**
अज आया फोन अचानक ही मिंजो   दूरे दें साखां ते।
"करा दी रूह मिलणे यो तेरैं मधरा खरा मिलदा"।
🙏
**