Monday 29 February 2016

भासा दीया ओड्डिया च

भासा दीया ओड्डिया च प्रैम पी:ह्ण पाई रक्खा।
जा:ह्लू तीएं कुल्हा पाणी घराट्टे जो चलाई रक्खा।
**
बीई भाईचारे दे लगी पौह्ण उंगरना
औणे आळे सम्बते जो ऊरीयां लगाई रक्खा।
**
गोड्डियाँ गुडाई रक्खा कुल्हां पाणी लाइ रक्खा
सूरां कनै बान्द्रां ते खेतीया बचाई रक्खा।
**
जेह्ड़ा 'खुराफात्ती' खरपात मुण्ड चुक्की औयै
समेत ज:ह्डाँ पुट्टी करी ती:ह्जो ला:ह्मबैं लाई रक्खा।
**
बाडां होईयाँ चौड़ीयां खेतरंजो खाणा प्:ह्यीयां
रळी मिळी व:ह्ड्डी टुक्की तिन्हें सूतैं पाई रक्खा।
**
बेह्लडां बौळ्दां जो खरीया मत्ती लाई रक्खा
हळ्लैं जुंगडैं लाई रक्खा सुक्क़ीया गा:ह्णी पाई रक्खा।
**
वसदेयां घरां आस प्रौह्णेयां दी लाई रक्खा
मन्जा अंगणे डा:ह्यी रक्खा चुल्हैं चा:ह् चढ़ाई रक्खा।
**
अप्पणीयां हौआँ कनै अम्बर भी अप्पणा ही
व्चारां दीयां उच्चीयां पतंगा जो उड़ाई रक्खा।
**
को:ह्की काळा भेड्डू जा:ह्णी मुच्ची नै पेच्चा पायै
कट्टी नै पतंग ती:ह्दी धूड़ी च ऱुळाई रक्खा।
**
घरैं घुसड़ी नै जिन्हा खिं:न्दा फग्गळ पाई ते:ह्यो
छुप्पीयाँ छछूंदरां जो कड़ाकीयां लगाईं रक्खा।
**
हरियाणे जाळी-फूक्की धीयाँ भैणां वी नी दिक्खीयाँ
लोहड़ीया दे 'दुल्ले भट्ठे' आळे जो भुलाई रक्खा।
**
सोह्णे फुल्ले दिक्खी नै डाळीया ते तोड़ा मत
रब्ब दीयां रू:हाँ बिच्च मन चित्त लाई रक्खा।
**
'वुसुआस' ई:न्ज्या बोळणे जो इक्क पल लग्गदा
समझणे समझाणे जो पूरी जिंद लाई रक्खा।
**
भास्णा दे रासणां नै ढिड्ड हण फटी जाणे
चज्ज दा कोई कम्म करा इतणा सुझाई रक्खा।
**
प्हाड़ीया दीयां रौणकां भई पञ्चो तुसे लाई रक्खा
भासा दीया धूणीयाँ दी अग्गी सुळ्गाई रक्खा।
****

Tuesday 23 February 2016

किच्छ् भी हासल करने तयींएं


किच्छ् भी हासल करने तयींएं
अपणा कुच्छ गुआणा पौंदा।
अपणी जगह बणाणे तयींएं
अपणा मुल्ल लुआणा पौंदा।

कुर्सिया दीया चास्सा कनैं हो:ईयो
जेहड़े जक्ख् नैं अन्हें
सुच्चिया अग्गी भ:ख्या चिमटा
कुस्की जो तां छु:आणा पौंदा।

बोलणे आळे मते कठरो:ह्यो
देश भगतीया दे म:झमेँ ला:ह्यो
बड़ीयाँ गल्लां बड़े मच:ल्लण
न्हेरिया पत्थर ढोई ला:ह्यो
सरह्द्दां जो सगणे तयींएं
वीराँ जो लहु गुआणा पौंदा।

जाह्ली जैह्रे दी पुङ्ग थी लुंगी
कैंह् नी ढक्का ते दित्ती ठुंग्गी
हण जे बेल्लां चढ़ीयां गासैं
बिछणा लागींयां चौह्नी पास्सें
जां जे झळसोणा लग्गे पास्से
अग्गी कम्बळ ह्डुआणा पौंदा।

मैं जे बोल्ला तां लगणी कौड़ी
लग्गै बज्जदी सिरें हथौड़ी
अझें भीई मन्नी लै तू कै:ह्णा
ठन्डे डमाक्कें सोची लैणा
होर्नि चिक्कड़ सट्टणे ते पै:ह्लें
अपणा मुंह धुआणा पौंदा।
***