सच्चीयाँ गलाण लग्गै

शैहते तें भी मिठड़ा तेरा गलाण लग्गै।
चमेलीया मै:हकदीया नै तेरी पछाण लग्गै।
**
दूयेयां दीयां कमाईयां तां झट्ट उड़ाण लग्गै।
पौंदी पीड़ तिस्जो जिस्दा जे लाण लग्गै
**
बोल्लां जे सच्चईयां गल्लां लोकां जो व्खाण लग्गै।
चुगलीयां मैं:हन्जरां पां तां सै: शिव पुराण लग्गै।
**
मुफ़्ता दीयां स्ला:हीं अणमुक् हर कोई गलाण लग्गै।
पौयै निभाणा अप्पू ता गळे दा फ़ा:ह्ण लग्गै।
**
धन्न सस्सू दा बतीरा जिसा नूंह धियाण लग्गै।
तिसा धीया दा क्या करीये प्योकेयां जो खाण लग्गै।
**
उम्र भर नी भरोए अपणे ही ढिड्ड टोये।
क्या धड़ी क दान लग्गै जा:ह्लु प्राण जाण लग्गै।
**
लीडर सभते अग्गैं  ती:ह्ली लाण लग्गै।
जा:ह्लु होई हटन लियान्ने ता:ह्लु अग्गी बुझाण लग्गै।
**
मक्कार चापलूसां दी आखर मुक्हाण लग्गै।
खान्देयां न खाण लग्गै मंज्जेयां न बाण लग्गै।
**
असां अपने पेट घुट्टे बच्चेयाँ न आ:ह्ण लग्गै।
हण सै: गला:ह्ण औक्खे ता ढिड्डे च बाण लग्गै।
**
अमीर गरीब कुछ नी सब्भनीं नै छड्डणी दुनीयाँ।
मुर्दुआड़ लग्गै कोई भणी पै:हलवाण लग्गै।
**
मसलेयां दी म्ह्लस् जिन्दड़ी मुकी जाणी ढाण लग्गै।
मुकी जाणी रैह्न्दी खो:ह्न्दी जे दुखड़े सुणाण लग्गै।
**
योगा करने वाळा सेहतां बणान लग्गै।
आत्मा चमकाण लग्गै देहईया सजाण लग्गै।
***
तेजकुमार सेठी।🙏🏻

***

blog dhauladhar: माह्णुयें नी बदलोंणा

blog dhauladhar:  माह्णुयें नी बदलोणा



"मा:ह्णुयें  नी बदलोणा"



माह्णुयें दा त्वार क्या होणा
मुश्कल है माह्णु पछणोणा।
लगदा बाह्रीएं जिन्ना सोह्णा
अन्द्रीयें उतणा ही घणौणा।

**
माह्णुयें अन्दर दूआ माह्णु
औक्खें वेल्लैं पौंदा टोह्णा।
जिन्ना मिल्लै उन्ना थोड़ा
माह्णुयें दा नी ढिड्ड भरोंणा।
**
जिंदेयां जी दौड़ नी मुकणी
मरने परंत वी  नी वसोणा।
मुल्ख खाई नै वेह्ले कित्ते
बैंक भीई वी ल:गग्यो भरोंणा।
**
तेरीया गट्ठी है ता तेरा माह्णु
जे उ:ह्दीया तां ति:ह्दा होणा।
जे:ह्बां आळे दा है माह्णु
फ़गताल्लां दा कैंह् कोई होणा।
**
हर वक्खीया  मुफ़्ता दी टोळै
विन भाडैं मह्यी नी खड़ोणा।
सा:ह्मणीयाँ तां हस्दीयाँ हाक्खीं
पीट्ठी पीछैं छुरा ख्वोह्णा।
**
इक्क ता प्रौह्णा औंदा ही नी
आई जायै ता ह्यी नी झलो:ह्णा।
जे कुती टिकी जाए होर दो ध्याड़े
लगी जे पौणे वट्ट क्ढो:ह्णा।
**
माह्णुयें दा हत्थ जित्थी छो:ह्णा
गंगा मैल्लीया कैंह् नी होणा।
इस मुलखे दा दस्स क्या होणा
जिव्हा ही दंदां हेठ टकोणा।
**
पैदा तां हुँदा माँ:ह्णु सच्चा
गुआच्दा जाँदा जी:ह्याँ वड्रोणा।
कितणा पिट्टणा कितणा रोणा
ईत् घराट्टैं दे:ह्या ही पिह्यो:णा।
**
माँ:ह्णुयें  लग्गा नी सुधरोणा
संतां  सुआ:ह् सिर संढरो:ह्णा।
पीर पैगंबर थकी हारी गै
अपण माँ:ह्णुयें नी बदलोणा।
**
टीवीयां मीडीयाँ प्रधानां ग्लोणा
ग़रीब राड़ान्दा कु:जो सुण्होणा।
फ:ट्टेयो दिले कीं:ह्नयाँ सियोंणा
पेम दा धाग्गा सुईया प्रोणां 1
**
सरकारां जे दे:ह्यींयाँ खरीयां
दलत कजो ल:हग्न फुकोणा।
खरे दिन होर कदे:ह् औणे
दालीं लगीयाँ स्माणे छो:णा 1
****

ढिल्ला धागा

तेरे मेरे च ढिल्ला धाग्गा बड़ा मत पडेरदा।

इसा बुणतरा च जान स्हाड़ी
दिक्खेयां उधेड़दा।

दोस्तीया मेरीया मत
शक़्क़े नै कुदेरदा।
मैं चाणचक्क् ही औणा
तू  भित्तां मत ढफेरदा।

आ:ह्ण गोळे व:ह्ण लक्ख
रिह्यां दिले जो ठंधेरदा।
दिक्खदा जायाँ कि:हन्ज्यां
मैं सूरजे खरेड़दा।

जिस् अम्बोटुएं ढक्कैं असां
रह्यी लाई राग़ गाणे
कुरी फळी पौणा तिस्स
तू  हाक्खीं मत तरेरदा।

सियास्ती दे खुन्डें नेता
गाईं जो परसेरदा।
चेल्लेयां जो चुळी अप्पू
दुधूनूंयैं मधेरदा।

तीसा हई नी तैं: नै जाणा
तू पग्गा रै:ह् पडेरदा।
मैं घोड़ीया ब्हाई लई जाणी
तू सेहरे रै: सधेरदा।

होर्ना दीयां भूणीयां पिट्टी
जिंदडू कैं:ह् धकेरदा।
तिज्जो भी कुछ खाणा मिलै
पैसे कु:जो कठेरदा।

मदाद कर उ:दी जेहड़ा
जिन्दगीया सधेरदा।
भरोणे नी ढिड्ड मंगतेयां दे
इन्हां मत   गझे:रदा।

हाक्खीं खोप्पु चाह्ड़ी झोट्टा
को:ह्लुए घुमेरदा।
माँ:ह्णु जे चढ़ाई चल्यो
कोई नी पतरेरदा।

कुण कदे:  शिवां पर
दुद्धाँ तू मधेरदा।
विळखा दे बच्चे भुक्खे
तिन्हां कैं:ह् तरसेरदा।

झळस्होया हिरखैं नै अग्गैं
होर भी जळेरदा।
पप्पू अद्धा माँ:ह्णु अप्पू
दूआ मोदी बकळेरदा।
**
तेजकुमार सेठी।

कन्नाँ धुआई नै चला

कन्नाँ धुआई नै चला।
इस ज़माने दे रंग ढंग 
ठीक  नी 'न लग्गा दे,
कोई छिकड़ा मुंहैं
पर चढ़ाई नै चला।
**
कण्डेयां ते पैरां जो
बचाई नै चला।
कण्डेयाँ ते बचणे जो
पाई लैंह्नगे जुट्टे ,
फुल्लां ते भी
जान छुड़ाई नै चला।
**
मंदरां च जा:ह्नगे
चढतां चढ़ा:ह्नगे।
भुक्खे जो भी दो ग्राह्
खुआई नै चला।
**
वुजुर्गां दे ला:ह्यो अम्ब
झप्फी झणी छड्डे।
गाँह् देयां जो भी
रुख लाई नै चला।
**
अंन्हेंयां जो नी सुझै
तुसेहाँक्खीं आळे।
अन्हेंयाँ जो सड़का
लंघाई नै चला।
**
दूएं हत्थें देयी गड्डी
रोणा तां अप्पु होया।
अपणी गड्डी अप्पू
चलाई नै चला।
**
सिरैं ही चढ़ी औ:ह्ण 
जे बद्दळ गड़कदे।
खरी कीत्ता इन्हां जो
ब:ह्राई नै चला।
**
खून इक्क खुदा इक्क
ख्वाहिश इक्क जीणे दी।
नोट इक्क खी:स्से लग
लग पाई नै चला।
**
बद्धणे तेह्यी नी हटदा
इच्छां दा पतराह।
सुख लैणा सच्चा ता
इस रड़ाई नै चला।
**
बगाड़ने जो पल नै
बणाणे जो उमरां
दुसमणां नैं भी हत्थां
मलाई नै चला।
**
ई:ते पै:ह्लैं जे अग्गां
पाई देह्न लियान्ने।
अप्णीयां ही अग्गीं
बुझाई नै चला।
**
पै:ह्नीं नै चले:ह्यो
सब रंगदार चश्में।
इन्हां ऐनकां जो
घुआ:ह्यी नै चला।
**
जेहड़ी ऊंगळी इसारे
करै दूएयां पास्सें।
तीसा अपणे पास्सें
भी मुड़ाई नै चला।
**
बोज्झा ढाई नै चला
मौज्जां लाई नै चला।
अप्णी जिंदड़ी दे भी
सुपने सजाई नै चला।
***

सच्चे जो सच दसणा औक्खा

ग़ज़ल

सच्चे जो सच दसणा औक्खा
झूठे दा पख रखणा औक्खा।

चखणा सौक्खा बासमती  दा
मच्च धान्ना दा मच्चणा औक्खा।

बाज्जा लगदा सौक्खा दिखणा
पर चज्जे नै बज्जणा औक्खा।

शैह्दे दा सौक्खा चटखारा,
पर द्रोह्ळे दा सच्चणा औक्खा।

ठगी सकदा मुन्जो हर कोई,
मुन्जो कुसी की ठगणा औक्खा।

आँदराँ तिक ममता पळचोह्यिओ
इन्हां तारां जो कढणा औक्खा।

माराँ खाई  सी नी कित्ती,
बा:ह्ज्जी संघे डडणा औक्खा।

द्रौपदिया दे चीर हरण पर
धृतराष्ट्रे जो खं:ङ्गणा औक्खा।

सौक्खा गडियां मोशन चकणा ,
पर जैम्मां तैं कढणा औक्खा।

सौक्खा दसणा  रस्ता प्हाड़ी ,
पर प्हाड़ां पर चढ़णा औक्खा।

सौक्खा जोस्सैं भरेया भाषण,
विच्च बैरियाँ गजणा औक्खा।

गैराँ बिच  प्ही बी  निभी जाह्न्गी,
बिच्च सरीकां  बसणा औक्खा।

चोरे ते जादा  पँड का:ह्ली,
चोरे पिच्छैं नह्ठणा औक्खा।

कम्म चलाऊ गज़लाँ मतियाँ
‘तेज’खयाल्लाँ सजणा औक्खा।

तेजकुमार सेठी।
धर्मशाला।

बद्दनीत्ता कोई काळा बद्दळ

blog dhauladhar: blog dhauladhar: blog dhauladhar: अज्जे दी ग़ज़ल: this



बद्दनीत्ता कोई काळा बद्दळ,

हच्छीयां धारां घेरा करदा।

लहु-लुहाण तस्वीरां को:की,

इस धरतू दीयां पेड़ा करदा।

**

बड़े बड़े धुनत्तर रह्यी गै,

दुनियां अज्जे तिक् नी सुधरी।

तैं भी बाज्जड़ होई जाणा,

सुणेयां तू भी सधेरा करदा।

,**

म्हैस्सी दा रंग काळा ही रै:ह्णा,

क्रीम्मां लक्ख चमेड़ा करदा।

सूरज भी कोई भोरैं अपणी,

सै: सूरज भी ह्नेरा करदा।

**

भुक्खे भाणे रो:ह्ण नियाणे,

माळां कै:ह्दीयाँ फेरा करदा।

"तौ" क्या हुँदा जाणै सै: ही

अप्णीयां मुक्हाणी जेह्ड़ा करदा।

**

सिद्धिया उंगळा घ्यो निकलै नी,

कैं: नी उँगळा जो ढेरा करदा।

हर गल्ल मन्नी तेरी मितरा,

भीई वी हाक्खीं तरेरा करदा।

**

पैसेयां खुआई बणेया मनिस्टर,

दब्बी नै धन्न कठेरा करदा।

मत्थेयां रगड़दा नी था हटदा,

सै: हण मुंड्डे परेड़ा करदा।

**

तिलक धोतीयां लाई तोत्ता,

राम-नाम धुन छेड़ा करदा।

चुंज्जां नै भन्नी नै पिंजड़ा,

उड्डणे दी गल्ल छेड़ा करदा।

**

जाणीय्या जो रीत प्रीत दी,

दिलां सब्भनां दे डेरा करदा।

लई क्या जाणा अप्पू सौग्गी,

कुस ताईं तेरा-मेरा करदा।

**

बद्दळ लीरो लीर बह्रा दे,

कुण ऐ खिं:नदाँ धेड़ा करदा।

जल-थल गुद्दड़ नाळ भरो:ह्यो,

धरतू अम्बर सेड़ा करदा।

**

तेजकुमारसेठी।🙏🏻💭🏔🌏

अंगणे दे बोटुए दीयां

अंगणे दे बोटुए दीयां  मत कटदे  टा:ह्णीयां।
ई:दीया ही छौंईं तौंदीया मंज्जीयाँ न डा:ह्णीयां।

***

बंडी बंडी वोटां जिन्हां सीटां बणाणीयां।
कल तिन्हैंई स्हाते नक्क़ घड़ी:स्सीयाँ लूआणीयाँ।

**

 वगते दीयां माराँ गु:ह्ज्ह्यीयां  कुसी नी पछ्याणीयां।
सु:ज्झदीयां नी डाँगां ईःदीयां खस्मा जो खाणीयाँ।

**

मु:ह्यें अपणे सी नै रक्ख मेरेया दिलो जाणीयां।
दु:ख्दे दिले दी गल्लां लोक्काँ  उड्डाणीयाँ।

**

माऊ दीयां गु:थीयाँ खि:न्दाँ मैं नी धड़ाणीयाँ।
इन्हां टलीयाँ विच्च छुपीयां माऊ दीयां नसाणीयाँ।

**

खरीयां न औ:ह्न गल्लां कैं:ह् बुरीयाँ वी लाणीयां
नमुल्लियाँ घड़ीयाँ जिंदू दीयां बीत्ती जाणीयां।

**

चिंदैं मत   तू  वा:ह्दू मेरे यारा  हाणीयाँ।
दहीं रिड़की छड्डणां अप्पू वगते दीया मधाणीयां।

**

मैं  चूटदा रे:ह्या नकम्मा ऊंज्जळा नै पाणीयाँ।
एह् जाणेयाँ ही नी वगतें झड़ीयां लाणीयां।

**

पता जे हुँदा मुँज्जो तैं दिलैं ने लाणीयां।
खुरँडी नी बैठदा मैं यादां पुराणीयाँ।

**

चोट्टां दिले दीयां दिले च ही जिक्की पाणीयां।
जां चिक्का दी माँ घड़ी नै तीसा नै गलाणीयाँ।

**

खड़ू:ह्त्या ढिगा ध्याड़ा ह्ण गा:ह्णी नी गा:हाणीयाँ।
छडी देया वौळ्दां वी लग्यो भुक्खे भाणीयां।

**

मन सौणे जो करादा लम्मीयां सौरी ताणीयां।
खेतीया स्महाल्न गांह् जिन वा:ह्णीयां कमाणीयाँ

**

सरीफां दा कम्म ह्यी नी चोणां च  हाणीयाँ।
जे खड़ूई भी जा:ह्नगे तां कुनी वोटां नी पाणीयां।

**

औआ दी याद मुँज्जो प:केयां अम्बां दी डफ् डफ्।
सै: पी:ह्नगां पाणीयां लम्मीयां हन्गाणीयां।

**