पुआड़ा धुप्पा दा

सौ:हग्गें होई नै ला: बियाड़ा धुप्पा दा।
कुसकी मंगी  लैणा   भाड़ा धुप्पा दा।
**
लोक्कां दींयां धुप्पां जाई मत बचळोयें।
गुहाड़ अपणा गुआड़-पुछाड़ा धुप्पा दा।
**
होरती ता बारी मिलणी नी एं बद्दलां ते।
जाई पञ्चीया सेक  धियाड़ा धुप्पा दा।
**
बह्रदीया तौंदीया झल्लीयाँ जिन्हां सपूतां।
लिखी दे तिन्हां दे नांयें  जाड़ा धुप्पा दा।
**
असेह्यी भेज्जेयो बद्दळ चुणीनै गासले।
करी छड्डेया तिन्हें इ खुआड़ा धुप्पा दा।
**
सूई ठै:हरा करदी कार-क्रीन्देयाँ ऊपर।
मन ता ज़रा भी नी था माड़ा धुप्पा दा।
**
अपणी ईद दियाळी अपणी कोई हुज्ज नी।
भिह्यी वी पा:हंयां कुनकीं पुआड़ा धुप्पा दा।
**
सै:ह्यी गल्लां सै:ह्यी मच्चळड़ सै:ह्यी चाब्बां।
नौआँ हण कोई कम्म   नुआड़ा धुप्पा दा।
**
न्हेरैं ही पत्थरां ढोआ करदे न्हेर बुपारी।
फ:स्सेया तिन्हां दे ढिड्डें  राड़ा धुप्पा दा।
**
खाणे जो ता ठुंग नी न कोई लुंग जैह्रे दी।। ज़
तिन्हां जो मत पढ़ाएं प्हाड़ा धुप्पा दा।
**
घुळखा दे जीणेंय्यो माँ:हणु हन मुलखां दे।
पिह्या तिन्हां जो बगत कुराड़ा धुप्पा दा।
**
मा:हणु कुनी छोटा कुनी बड्डा करी छड्डेया।
पा:ह्या कुनी मोच्छा  कनै फाड़ा धुप्पा दा।
**
सच्च:य्यो ढिड्ड पिट्ठी नै जीन्हां भाऊआं दे।
बज्जदा तिन्हां दीया पिट्ठी नगाड़ा धुप्पा दा।
**
अंदरों अंदर पह्यीयो खौ:दळ टब्बराँ दी।
 कुस मूँहै मारी जाआ दे दाड़ा धुप्पा दा।
 **
तेजकुमार सेठी। धर्मशाला।

blog dhauladhar: blog dhauladhar: ग़ज़ल रगड़े'

blog dhauladhar: blog dhauladhar: ग़ज़ल 'रगड़े

रगड़े।

**

बैठी असां  समा:ह्णे रगड़े।

कितने  होर  लुआणे रगड़े।

**

सुर बणी नै मेरेयाँ  गीतां दे।

गोआ  दे नौंएं पुराणे रगड़े।

**

रगड़ेयाँ खाई मैं बड्डा होया

गाई गाई  सुणाणे रगड़े।

**

तेरीयां गल्लां छुं:ह्यीं दीयां हह्लां।

हिक्का सुआड़ू  बुहाणे रगड़े।

**

मसैं इन्हां दा मुल्ल चुका:ह्या।

मुफ्ते  च  नी  गुआणे रगड़े।

**

कुछ रगड़े तां लहुएँ स:ग्गेयो।

मसांकड़ी तिक्क पुजाणे रगड़े।

**

ज्हादीयाँ जो कुण समझायै।

लगदा   होर  लुआणे  रगड़े।

**

मुण्ड ऊखळीया दित्तेया ह्यीया।

मूह्लैं  मूह्ल   कुटाणे रगड़े।

**

रगड़े मैंह् तांईं  छत्तर-छाईं।

छन्नी  गास  छुआणे रगड़े।

**

कुछ रगड़े  सच्च बणी गै मेरे।

किं:ह्नयां फिरी झुठाणे रगड़े।

**

कई तां बैठय्यो इ बक़्ते फतूंह्णा।

सुण,   बक़तें वी छू:हाणे रगड़े।

**

बा:हज्जी रगडें जिन्दड़ी सूनी।

जीणे 'यो  होर   सदाणे रगड़े।

**

मेरीया सोच्चा दा बतीरा सै:ह्यी।

ताज़े   रोज  मुंगाणे   रगड़े।

**

गीत रगड़ेयाँ  दे  'न गळघुट्टू।

"तेज्जैं"  कु:जो सुणाणे रगड़े।

***

blog dhauladhar: ग़ज़ल 'लिखारिया'

blog dhauladhar: ग़ज़ल

प्हाड़ी पञ्ची 26 सितंबर,2016



सोच्चें जरा तू कुस तिंयें  लिखदा लखारिया।

दुखदी रग जकोंदी, जे तू  जिकदा लखारिया।

**

शेयरां खरीदी बेच्ची,   ढिड्ड होयेयो कई मोट्टे।

 पुलन्दा तेरे शेअरां दा, नी बिकदा लखारिया।

**

खुन्ड्डा आळे अपणीयाँ, सेक्का दे खरीयां रोटीयां।

तेरा रोट साफ़-सुथरा, कैं:ह् नी सिकदा लखारिया।

**

काळजुए दीया सेजळू च, जो शेअर हन स्रहोंदे

 तिन्हां दें सेक्केँ अग्गें,  कुण टिकदा लखारिया।

 **

इन्हां बजारीयां नी पढ़ने, तेरे शेअर  दे:हे कुराड़े।

एह लिखारियां इ पचाणे,जे तू लिखदा लखारिया।

**

 मिल्ले जे लोक सै: भी,  गोळ पैंदे आळे गड़बू।

 पाणा तिन्हां च वी क्या, नी टिकदा लखारिया।

 **

कई जम्मेयों इस कम्मयों, बस न्हेर इ पाणा आ:ह्यो।

तिन्हां न्हेरेयाँ प्रा:ह्लैं  लोंईं,  तू  लिखदा लखारिया।

**

इक्क ता चोर वी चरड़े,  दूआ हुक्म भी 'न करड़े।

दे:ह्याँ सँढरो:ह्याँ मुण्डाँ,  तू जिक्क्दा लखारिया।

**

तेरीयां  पैनीयाँ नजराँ,  दीयां फैलीयाँ ऐसीयाँ कदरां।

भदरां तिज्जो सा:ह्यीं,  कुण छिलदा लखारिया।

**

तू बीण्डेयाँ जो घड़दा,  कंनैं ठींन्डिया जो पुट्टदा।

जीं:हन्डेयाँ दीयां जड़ां,  तू थिक्कदा लखारिया।

**

चढ़ भौंएं गासलिया मंजला , सब तमासगीर हन।

दिक्खेयां नवालड़ीया छत्ती  ते ड़ीकदा लखारिया।

**

इस्स चौथेपणे च कुस,  सीस्से गां:ह् खडोणा।

अक्स पिता अपणे दा,   ही लिभदा लखारिया।



**

एह ढिल्ले धागे दी पत्त है, बद्धेय्यो प्रभु वी औंदे,

एह प्हाड़ी स्हाड़ी मत्त है, मत खिचदा लखारिया।

****

तेजकुमार सेठी, धर्मशाला।

**

ग़ज़ल

🙏��अज्जकणी जुगुयैळ🙏�
**  
(अज्जे दीया प्हाड़ी पञ्चीया च)
***
लड़ें ल:ग्गेया लड़ू:ह्दा लाड़ा उमर भर सुखाणा पौंदा।
लीन्डूये बौ:ह्लदे बारा ब्या:हधीं हलैं तां भी लाणा पौंदा।
**
धुखैं मियाळु चूल्हैं ताँ सुक्का न्या:ह्डू लाणा पौंदा।
बड़ा इ भळाम्बा भड़की पौंएं  सिन्ना पचरु पाणा पौंदा।
**
जिंदु दीया इमानती कन्नै ल:ग्गीयां सौ इलामतीं भी हन।
अपणीयाँ हिक्का सिल्ल रक्खी मत्था रोज़ लाणा पौंदा।
**
गो:ह्रां गुच्छीयाँ हण्डी टप्पी धूड़ धुडैंगा खाणा पौंदा।
ढिड्डे दीया बुझाणे खातर छित-पौल्ला भी खाणा पौंदा।
**
हत्थें कक्ख नी औणा कै:जो गुद्दडां इ बतुङगा करदे।
नियाणे जो लपेटणे जो नौंआं न्योळु सियाणा पौंदा।
**
कुण के:ह्यी मा जागते जो भुक्खे दिक्खी रह्यी सकदी।
  दुद्धे तिंयें जागते जो फिरी भी भाऊ कळाणा पौंदा।
**
ग्लाआ इस दुर्योधने जो सह्रंगती सो:ह्गें  रै:ह्णा सिक्ख।
मन्नणा नि ता तन्नणा भी है मुंज्जो अज्ज् गलाणा पौंदा।
**
मिलणा भी नि तो:प्य्यो  इनी धरती दे कुसी खूंजें जाई।
दिक्खेयां जे कुती सहान्ज़ो ह्यी महाभारत दुहराणा पौंदा।
**
बाह्रलेयां दुस्मणा जो भाऊ नत्तणा कुछ असान भी ह्या।
अन्दरले भेड्डू गुब्बणे तां अपणा मुण्ड फुटाणा पौंदा।
**
सरहद्दां पर खड़ोई नै बस भाषण ही नी देय्य्यी दे हुंदे।
देस्से जो बचाणे खातर ख:हल्ड़ू भी धड़ाणा पौंदा।
**
त्रिईये तरफैणे दीयां गल्तीयाँ जो बड़ी मत्त चुक्क दैं।
सच्चे मितरे अपणे नै सच्चो सच्च गालांणा पौंदा।
**
भुल्ली जांदा खरेयाँ बगतां हर कोई खड़ूस माँ:हणु।
दिलखुशां जो तां बुरा बगत अप्पू याद कराणा पौंदा।
**
जिन्हां जे बड़ेरया तिज्जो अपणेयाँ लहुआं सिंज्जी सिंज्जी।
तिन्हां माऊँ बुढ़ेयाँ  दा कर्ज भी ता चुकाणा पौंदा।
**
झुरलू नी फेरी देणा है  भाऊ गास्सा ते आई नै कुनी।
कुछ बणी दस्सणा तां हड्डाँ जो भी हिलाणा पौंदा।
**
आई जा:हङ्गा परमेसर भी ता लियौणी नी हैं तिज्जो थाळी।
अप्पू ही बा:ह्णा, अप्पू ही लुळणा, अप्पू ही गा:ह्णा पौंदा।
**
कसरी कोई होई पौयै डाक्टरां जो दखाणा पौंदा।
अंग कोई सड़ी जाए तां दड़ बट्टी नै बढाणा पौंदा।
**
पेस कोई चलै न जे डाक्टरिया दे इलाज्जां विच्च।
देवतूआं जो मत्था टेकी धूपड़ू भी धुक्खाणा पौंदा।
**
कोई भी नी बणदा मेया,  मैहरम अपणेयाँ जख्मां दा।
अपणा ज़ख्म अप्पणा ह्या, अप्पू जो इ ढुकाणा पौंदा।
**
मितरां नै भी क्या गल्ल करनी अजके इस जमाने च।
फोन्ने पर मिळणे तांईं  भी पै:ह्लैं  टैम बन्हाणा पौंदा।
**
बिज़ी बिज़ी औयै फोन,  इंटर -नैट ता मिलदा ह्यी नी।
सारा सारा दिन भाईया अपणा ही बगत भनाणा पौंदा।
**
इक्क शेअर केज़रीये भाईये जो:
*
सियास्सी खुन्ड गड्डी नै सौंगळ तिन्हां जो पाणा पौंदा।
निकळी पौयै 'पोल्ला' कोई  अपणा इ मुण्ड चुथाणा पौंदा।
**
बगदीयाँ दे सब्भ मित्तर मेल्ले चेल्ले कनै हाली मुआल्ली।
ढै:हत्तेयां दा बणदा नी कोई किल्ल्हेयां इ कळाणा पौंदा।
****
तेजकुमार सेठी,
धर्मशाला।

गोह् ई गाळी

किस्मत कर्मां जै:ह्रां आळी
क्या कढै डळया:ह् दी डाळी।
**
तां:ह्गां देयाँ तंदां कोई
सच्चा जोग्गी कड्ढै ताळी।
**
जां फिरि अप्पू भुगती रोई
कढ्णे पौणे गुआळी गुआळी।
**
बौ:हल्दां जो जुतणा ई पौणा
प्रैणी लेई नै कुद्देया हाळी।
**
पिट्ठी जुंंगड़ा मूँहैं छिकड़ा
धरत पटणी ह्यी नी सुखाळी।
**
गुरमत गुरुएं देह्यी सखाळी
कित्ती उम्रां तिक्क जुगाळी।
**
चण्डी चण्डी मेरे गुरुएं
गुच्चुम्यां कस्टां दीया आळी।
**
पसु पसु राय:ह्यीय्या पास्सैं
पसुपति मेरा दित्ता उट्ठाळी।
**
ध्याड़ा चढ़ै न घरोयै एत्थू
अट्ठों पै:ह्र ल:ह्ग्गीय्यो दियाळी।
*
जाह्लू कोई लोभी बद्दल
बह्रना ळ:ग्गन धुत्तर धाळी।
**
ज्ञाने दे मैं घियान्ने वाळी
दित्ते काळे बद्दल टाळी।
**
मेरी भाणी गप्पाहड़ जाणी
मितरां दित्ती गल्ल उछाळी।
**
तिन्हां ई मितरां चुप्पीया कित्ते
गुरुएं मू:ह्रैं सीट सम्हाळी।
**
होर कोई हुन्दा मेरीया ठा:ह्री
तां सै:  दिंन्दा खू:ह्यें छाळी।
**
दोस  नी देणा मेरे मित्तर
गि:ह्ज्ज्यो थे न्हेरे दीया राह्ळी।
**
दिक्खी नै सोहणे जेह फुल्ले
मत करदा मुंडणे दी का:ह्ली।
**
इक्क तां तीनि मुर्झाई जाणा
दूआ सुन्नी रै:ह्णी डाळी।
**
जोरावरीया पैंठी व्ह्याळी
तैं तां बोटिया 'गोह् ई गाळी'।
**
होर्नां जो भरी भरी प्री:ह्ये
मुंज्जो अद्ध प्री:हत्ती थाळी।
**

कौड़ीयां गल्लां

**
नौकरीया आळी ब्या:ह्यी नै
ताळूये अपणे झसदा रैह।
*
भीड़ा च धुत्त होएयो सब्भो
कल्हा अप्पू ची हसदा रैह।
*
मि:क्कियो पुळस घस्टोरां नै
मत जा:ह्णी नै फसदा रैह।
*
कुसी नी तिज्जो मूँहैं लाणा
तगमेयां अपणेयां दसदा रैह।
*
बत्रै:ह्ट्यो घोड़े पर चढ़ना ता
पल-पलैं काठिया कसदा रैह।
*
जै:ह्रे दे दण्द पुट्टी नै रख
 खड़पा भौंयें डसदा रैह।
 *
कौड़ा सच मैं गुळदे रै:ह्णा
जग भणी मुंजो हसदा  रैह।
*
पंडतें मंतर पड़-पड़ पढ़ने
नोट सौये दा दसदा रैह।
*
बणे बणे दी लकड़ी एह्त्थू
हसदा रसदा वसदा रैह।
*
मोट्टा खाणा मोट्टा लाणा
जीणा मरना सस्ता रैह।
*
चिणदा जा: मंजलां पर मंजलां
शिमला भौंए धसदा रैह।
*
बगणा दे रो-रु:ह्द्धीयां हाखीं
कौफ मने दा रसदा रैह।
*
लड़ जे लाणा नेतेयां कन्नै
अग्गैं पिछैं नहस्सदा रैह।
*
  भुंज्येया उमरां दीयां मारां ते
  बच्चड़ेयाँ कदी कुति दसदा रैह्।
***

सच्चीयाँ गलाण लग्गै

शैहते तें भी मिठड़ा तेरा गलाण लग्गै।
चमेलीया मै:हकदीया नै तेरी पछाण लग्गै।
**
दूयेयां दीयां कमाईयां तां झट्ट उड़ाण लग्गै।
पौंदी पीड़ तिस्जो जिस्दा जे लाण लग्गै
**
बोल्लां जे सच्चईयां गल्लां लोकां जो व्खाण लग्गै।
चुगलीयां मैं:हन्जरां पां तां सै: शिव पुराण लग्गै।
**
मुफ़्ता दीयां स्ला:हीं अणमुक् हर कोई गलाण लग्गै।
पौयै निभाणा अप्पू ता गळे दा फ़ा:ह्ण लग्गै।
**
धन्न सस्सू दा बतीरा जिसा नूंह धियाण लग्गै।
तिसा धीया दा क्या करीये प्योकेयां जो खाण लग्गै।
**
उम्र भर नी भरोए अपणे ही ढिड्ड टोये।
क्या धड़ी क दान लग्गै जा:ह्लु प्राण जाण लग्गै।
**
लीडर सभते अग्गैं  ती:ह्ली लाण लग्गै।
जा:ह्लु होई हटन लियान्ने ता:ह्लु अग्गी बुझाण लग्गै।
**
मक्कार चापलूसां दी आखर मुक्हाण लग्गै।
खान्देयां न खाण लग्गै मंज्जेयां न बाण लग्गै।
**
असां अपने पेट घुट्टे बच्चेयाँ न आ:ह्ण लग्गै।
हण सै: गला:ह्ण औक्खे ता ढिड्डे च बाण लग्गै।
**
अमीर गरीब कुछ नी सब्भनीं नै छड्डणी दुनीयाँ।
मुर्दुआड़ लग्गै कोई भणी पै:हलवाण लग्गै।
**
मसलेयां दी म्ह्लस् जिन्दड़ी मुकी जाणी ढाण लग्गै।
मुकी जाणी रैह्न्दी खो:ह्न्दी जे दुखड़े सुणाण लग्गै।
**
योगा करने वाळा सेहतां बणान लग्गै।
आत्मा चमकाण लग्गै देहईया सजाण लग्गै।
***
तेजकुमार सेठी।🙏🏻

***