blog dhauladhar: ग़ज़ल 'लिखारिया'

blog dhauladhar: ग़ज़ल

प्हाड़ी पञ्ची 26 सितंबर,2016



सोच्चें जरा तू कुस तिंयें  लिखदा लखारिया।

दुखदी रग जकोंदी, जे तू  जिकदा लखारिया।

**

शेयरां खरीदी बेच्ची,   ढिड्ड होयेयो कई मोट्टे।

 पुलन्दा तेरे शेअरां दा, नी बिकदा लखारिया।

**

खुन्ड्डा आळे अपणीयाँ, सेक्का दे खरीयां रोटीयां।

तेरा रोट साफ़-सुथरा, कैं:ह् नी सिकदा लखारिया।

**

काळजुए दीया सेजळू च, जो शेअर हन स्रहोंदे

 तिन्हां दें सेक्केँ अग्गें,  कुण टिकदा लखारिया।

 **

इन्हां बजारीयां नी पढ़ने, तेरे शेअर  दे:हे कुराड़े।

एह लिखारियां इ पचाणे,जे तू लिखदा लखारिया।

**

 मिल्ले जे लोक सै: भी,  गोळ पैंदे आळे गड़बू।

 पाणा तिन्हां च वी क्या, नी टिकदा लखारिया।

 **

कई जम्मेयों इस कम्मयों, बस न्हेर इ पाणा आ:ह्यो।

तिन्हां न्हेरेयाँ प्रा:ह्लैं  लोंईं,  तू  लिखदा लखारिया।

**

इक्क ता चोर वी चरड़े,  दूआ हुक्म भी 'न करड़े।

दे:ह्याँ सँढरो:ह्याँ मुण्डाँ,  तू जिक्क्दा लखारिया।

**

तेरीयां  पैनीयाँ नजराँ,  दीयां फैलीयाँ ऐसीयाँ कदरां।

भदरां तिज्जो सा:ह्यीं,  कुण छिलदा लखारिया।

**

तू बीण्डेयाँ जो घड़दा,  कंनैं ठींन्डिया जो पुट्टदा।

जीं:हन्डेयाँ दीयां जड़ां,  तू थिक्कदा लखारिया।

**

चढ़ भौंएं गासलिया मंजला , सब तमासगीर हन।

दिक्खेयां नवालड़ीया छत्ती  ते ड़ीकदा लखारिया।

**

इस्स चौथेपणे च कुस,  सीस्से गां:ह् खडोणा।

अक्स पिता अपणे दा,   ही लिभदा लखारिया।



**

एह ढिल्ले धागे दी पत्त है, बद्धेय्यो प्रभु वी औंदे,

एह प्हाड़ी स्हाड़ी मत्त है, मत खिचदा लखारिया।

****

तेजकुमार सेठी, धर्मशाला।

**

ग़ज़ल

🙏��अज्जकणी जुगुयैळ🙏�
**  
(अज्जे दीया प्हाड़ी पञ्चीया च)
***
लड़ें ल:ग्गेया लड़ू:ह्दा लाड़ा उमर भर सुखाणा पौंदा।
लीन्डूये बौ:ह्लदे बारा ब्या:हधीं हलैं तां भी लाणा पौंदा।
**
धुखैं मियाळु चूल्हैं ताँ सुक्का न्या:ह्डू लाणा पौंदा।
बड़ा इ भळाम्बा भड़की पौंएं  सिन्ना पचरु पाणा पौंदा।
**
जिंदु दीया इमानती कन्नै ल:ग्गीयां सौ इलामतीं भी हन।
अपणीयाँ हिक्का सिल्ल रक्खी मत्था रोज़ लाणा पौंदा।
**
गो:ह्रां गुच्छीयाँ हण्डी टप्पी धूड़ धुडैंगा खाणा पौंदा।
ढिड्डे दीया बुझाणे खातर छित-पौल्ला भी खाणा पौंदा।
**
हत्थें कक्ख नी औणा कै:जो गुद्दडां इ बतुङगा करदे।
नियाणे जो लपेटणे जो नौंआं न्योळु सियाणा पौंदा।
**
कुण के:ह्यी मा जागते जो भुक्खे दिक्खी रह्यी सकदी।
  दुद्धे तिंयें जागते जो फिरी भी भाऊ कळाणा पौंदा।
**
ग्लाआ इस दुर्योधने जो सह्रंगती सो:ह्गें  रै:ह्णा सिक्ख।
मन्नणा नि ता तन्नणा भी है मुंज्जो अज्ज् गलाणा पौंदा।
**
मिलणा भी नि तो:प्य्यो  इनी धरती दे कुसी खूंजें जाई।
दिक्खेयां जे कुती सहान्ज़ो ह्यी महाभारत दुहराणा पौंदा।
**
बाह्रलेयां दुस्मणा जो भाऊ नत्तणा कुछ असान भी ह्या।
अन्दरले भेड्डू गुब्बणे तां अपणा मुण्ड फुटाणा पौंदा।
**
सरहद्दां पर खड़ोई नै बस भाषण ही नी देय्य्यी दे हुंदे।
देस्से जो बचाणे खातर ख:हल्ड़ू भी धड़ाणा पौंदा।
**
त्रिईये तरफैणे दीयां गल्तीयाँ जो बड़ी मत्त चुक्क दैं।
सच्चे मितरे अपणे नै सच्चो सच्च गालांणा पौंदा।
**
भुल्ली जांदा खरेयाँ बगतां हर कोई खड़ूस माँ:हणु।
दिलखुशां जो तां बुरा बगत अप्पू याद कराणा पौंदा।
**
जिन्हां जे बड़ेरया तिज्जो अपणेयाँ लहुआं सिंज्जी सिंज्जी।
तिन्हां माऊँ बुढ़ेयाँ  दा कर्ज भी ता चुकाणा पौंदा।
**
झुरलू नी फेरी देणा है  भाऊ गास्सा ते आई नै कुनी।
कुछ बणी दस्सणा तां हड्डाँ जो भी हिलाणा पौंदा।
**
आई जा:हङ्गा परमेसर भी ता लियौणी नी हैं तिज्जो थाळी।
अप्पू ही बा:ह्णा, अप्पू ही लुळणा, अप्पू ही गा:ह्णा पौंदा।
**
कसरी कोई होई पौयै डाक्टरां जो दखाणा पौंदा।
अंग कोई सड़ी जाए तां दड़ बट्टी नै बढाणा पौंदा।
**
पेस कोई चलै न जे डाक्टरिया दे इलाज्जां विच्च।
देवतूआं जो मत्था टेकी धूपड़ू भी धुक्खाणा पौंदा।
**
कोई भी नी बणदा मेया,  मैहरम अपणेयाँ जख्मां दा।
अपणा ज़ख्म अप्पणा ह्या, अप्पू जो इ ढुकाणा पौंदा।
**
मितरां नै भी क्या गल्ल करनी अजके इस जमाने च।
फोन्ने पर मिळणे तांईं  भी पै:ह्लैं  टैम बन्हाणा पौंदा।
**
बिज़ी बिज़ी औयै फोन,  इंटर -नैट ता मिलदा ह्यी नी।
सारा सारा दिन भाईया अपणा ही बगत भनाणा पौंदा।
**
इक्क शेअर केज़रीये भाईये जो:
*
सियास्सी खुन्ड गड्डी नै सौंगळ तिन्हां जो पाणा पौंदा।
निकळी पौयै 'पोल्ला' कोई  अपणा इ मुण्ड चुथाणा पौंदा।
**
बगदीयाँ दे सब्भ मित्तर मेल्ले चेल्ले कनै हाली मुआल्ली।
ढै:हत्तेयां दा बणदा नी कोई किल्ल्हेयां इ कळाणा पौंदा।
****
तेजकुमार सेठी,
धर्मशाला।

गोह् ई गाळी

किस्मत कर्मां जै:ह्रां आळी
क्या कढै डळया:ह् दी डाळी।
**
तां:ह्गां देयाँ तंदां कोई
सच्चा जोग्गी कड्ढै ताळी।
**
जां फिरि अप्पू भुगती रोई
कढ्णे पौणे गुआळी गुआळी।
**
बौ:हल्दां जो जुतणा ई पौणा
प्रैणी लेई नै कुद्देया हाळी।
**
पिट्ठी जुंंगड़ा मूँहैं छिकड़ा
धरत पटणी ह्यी नी सुखाळी।
**
गुरमत गुरुएं देह्यी सखाळी
कित्ती उम्रां तिक्क जुगाळी।
**
चण्डी चण्डी मेरे गुरुएं
गुच्चुम्यां कस्टां दीया आळी।
**
पसु पसु राय:ह्यीय्या पास्सैं
पसुपति मेरा दित्ता उट्ठाळी।
**
ध्याड़ा चढ़ै न घरोयै एत्थू
अट्ठों पै:ह्र ल:ह्ग्गीय्यो दियाळी।
*
जाह्लू कोई लोभी बद्दल
बह्रना ळ:ग्गन धुत्तर धाळी।
**
ज्ञाने दे मैं घियान्ने वाळी
दित्ते काळे बद्दल टाळी।
**
मेरी भाणी गप्पाहड़ जाणी
मितरां दित्ती गल्ल उछाळी।
**
तिन्हां ई मितरां चुप्पीया कित्ते
गुरुएं मू:ह्रैं सीट सम्हाळी।
**
होर कोई हुन्दा मेरीया ठा:ह्री
तां सै:  दिंन्दा खू:ह्यें छाळी।
**
दोस  नी देणा मेरे मित्तर
गि:ह्ज्ज्यो थे न्हेरे दीया राह्ळी।
**
दिक्खी नै सोहणे जेह फुल्ले
मत करदा मुंडणे दी का:ह्ली।
**
इक्क तां तीनि मुर्झाई जाणा
दूआ सुन्नी रै:ह्णी डाळी।
**
जोरावरीया पैंठी व्ह्याळी
तैं तां बोटिया 'गोह् ई गाळी'।
**
होर्नां जो भरी भरी प्री:ह्ये
मुंज्जो अद्ध प्री:हत्ती थाळी।
**

कौड़ीयां गल्लां

**
नौकरीया आळी ब्या:ह्यी नै
ताळूये अपणे झसदा रैह।
*
भीड़ा च धुत्त होएयो सब्भो
कल्हा अप्पू ची हसदा रैह।
*
मि:क्कियो पुळस घस्टोरां नै
मत जा:ह्णी नै फसदा रैह।
*
कुसी नी तिज्जो मूँहैं लाणा
तगमेयां अपणेयां दसदा रैह।
*
बत्रै:ह्ट्यो घोड़े पर चढ़ना ता
पल-पलैं काठिया कसदा रैह।
*
जै:ह्रे दे दण्द पुट्टी नै रख
 खड़पा भौंयें डसदा रैह।
 *
कौड़ा सच मैं गुळदे रै:ह्णा
जग भणी मुंजो हसदा  रैह।
*
पंडतें मंतर पड़-पड़ पढ़ने
नोट सौये दा दसदा रैह।
*
बणे बणे दी लकड़ी एह्त्थू
हसदा रसदा वसदा रैह।
*
मोट्टा खाणा मोट्टा लाणा
जीणा मरना सस्ता रैह।
*
चिणदा जा: मंजलां पर मंजलां
शिमला भौंए धसदा रैह।
*
बगणा दे रो-रु:ह्द्धीयां हाखीं
कौफ मने दा रसदा रैह।
*
लड़ जे लाणा नेतेयां कन्नै
अग्गैं पिछैं नहस्सदा रैह।
*
  भुंज्येया उमरां दीयां मारां ते
  बच्चड़ेयाँ कदी कुति दसदा रैह्।
***

सच्चीयाँ गलाण लग्गै

शैहते तें भी मिठड़ा तेरा गलाण लग्गै।
चमेलीया मै:हकदीया नै तेरी पछाण लग्गै।
**
दूयेयां दीयां कमाईयां तां झट्ट उड़ाण लग्गै।
पौंदी पीड़ तिस्जो जिस्दा जे लाण लग्गै
**
बोल्लां जे सच्चईयां गल्लां लोकां जो व्खाण लग्गै।
चुगलीयां मैं:हन्जरां पां तां सै: शिव पुराण लग्गै।
**
मुफ़्ता दीयां स्ला:हीं अणमुक् हर कोई गलाण लग्गै।
पौयै निभाणा अप्पू ता गळे दा फ़ा:ह्ण लग्गै।
**
धन्न सस्सू दा बतीरा जिसा नूंह धियाण लग्गै।
तिसा धीया दा क्या करीये प्योकेयां जो खाण लग्गै।
**
उम्र भर नी भरोए अपणे ही ढिड्ड टोये।
क्या धड़ी क दान लग्गै जा:ह्लु प्राण जाण लग्गै।
**
लीडर सभते अग्गैं  ती:ह्ली लाण लग्गै।
जा:ह्लु होई हटन लियान्ने ता:ह्लु अग्गी बुझाण लग्गै।
**
मक्कार चापलूसां दी आखर मुक्हाण लग्गै।
खान्देयां न खाण लग्गै मंज्जेयां न बाण लग्गै।
**
असां अपने पेट घुट्टे बच्चेयाँ न आ:ह्ण लग्गै।
हण सै: गला:ह्ण औक्खे ता ढिड्डे च बाण लग्गै।
**
अमीर गरीब कुछ नी सब्भनीं नै छड्डणी दुनीयाँ।
मुर्दुआड़ लग्गै कोई भणी पै:हलवाण लग्गै।
**
मसलेयां दी म्ह्लस् जिन्दड़ी मुकी जाणी ढाण लग्गै।
मुकी जाणी रैह्न्दी खो:ह्न्दी जे दुखड़े सुणाण लग्गै।
**
योगा करने वाळा सेहतां बणान लग्गै।
आत्मा चमकाण लग्गै देहईया सजाण लग्गै।
***
तेजकुमार सेठी।🙏🏻

***

blog dhauladhar: माह्णुयें नी बदलोंणा

blog dhauladhar:  माह्णुयें नी बदलोणा



"मा:ह्णुयें  नी बदलोणा"



माह्णुयें दा त्वार क्या होणा
मुश्कल है माह्णु पछणोणा।
लगदा बाह्रीएं जिन्ना सोह्णा
अन्द्रीयें उतणा ही घणौणा।

**
माह्णुयें अन्दर दूआ माह्णु
औक्खें वेल्लैं पौंदा टोह्णा।
जिन्ना मिल्लै उन्ना थोड़ा
माह्णुयें दा नी ढिड्ड भरोंणा।
**
जिंदेयां जी दौड़ नी मुकणी
मरने परंत वी  नी वसोणा।
मुल्ख खाई नै वेह्ले कित्ते
बैंक भीई वी ल:गग्यो भरोंणा।
**
तेरीया गट्ठी है ता तेरा माह्णु
जे उ:ह्दीया तां ति:ह्दा होणा।
जे:ह्बां आळे दा है माह्णु
फ़गताल्लां दा कैंह् कोई होणा।
**
हर वक्खीया  मुफ़्ता दी टोळै
विन भाडैं मह्यी नी खड़ोणा।
सा:ह्मणीयाँ तां हस्दीयाँ हाक्खीं
पीट्ठी पीछैं छुरा ख्वोह्णा।
**
इक्क ता प्रौह्णा औंदा ही नी
आई जायै ता ह्यी नी झलो:ह्णा।
जे कुती टिकी जाए होर दो ध्याड़े
लगी जे पौणे वट्ट क्ढो:ह्णा।
**
माह्णुयें दा हत्थ जित्थी छो:ह्णा
गंगा मैल्लीया कैंह् नी होणा।
इस मुलखे दा दस्स क्या होणा
जिव्हा ही दंदां हेठ टकोणा।
**
पैदा तां हुँदा माँ:ह्णु सच्चा
गुआच्दा जाँदा जी:ह्याँ वड्रोणा।
कितणा पिट्टणा कितणा रोणा
ईत् घराट्टैं दे:ह्या ही पिह्यो:णा।
**
माँ:ह्णुयें  लग्गा नी सुधरोणा
संतां  सुआ:ह् सिर संढरो:ह्णा।
पीर पैगंबर थकी हारी गै
अपण माँ:ह्णुयें नी बदलोणा।
**
टीवीयां मीडीयाँ प्रधानां ग्लोणा
ग़रीब राड़ान्दा कु:जो सुण्होणा।
फ:ट्टेयो दिले कीं:ह्नयाँ सियोंणा
पेम दा धाग्गा सुईया प्रोणां 1
**
सरकारां जे दे:ह्यींयाँ खरीयां
दलत कजो ल:हग्न फुकोणा।
खरे दिन होर कदे:ह् औणे
दालीं लगीयाँ स्माणे छो:णा 1
****

ढिल्ला धागा

तेरे मेरे च ढिल्ला धाग्गा बड़ा मत पडेरदा।

इसा बुणतरा च जान स्हाड़ी
दिक्खेयां उधेड़दा।

दोस्तीया मेरीया मत
शक़्क़े नै कुदेरदा।
मैं चाणचक्क् ही औणा
तू  भित्तां मत ढफेरदा।

आ:ह्ण गोळे व:ह्ण लक्ख
रिह्यां दिले जो ठंधेरदा।
दिक्खदा जायाँ कि:हन्ज्यां
मैं सूरजे खरेड़दा।

जिस् अम्बोटुएं ढक्कैं असां
रह्यी लाई राग़ गाणे
कुरी फळी पौणा तिस्स
तू  हाक्खीं मत तरेरदा।

सियास्ती दे खुन्डें नेता
गाईं जो परसेरदा।
चेल्लेयां जो चुळी अप्पू
दुधूनूंयैं मधेरदा।

तीसा हई नी तैं: नै जाणा
तू पग्गा रै:ह् पडेरदा।
मैं घोड़ीया ब्हाई लई जाणी
तू सेहरे रै: सधेरदा।

होर्ना दीयां भूणीयां पिट्टी
जिंदडू कैं:ह् धकेरदा।
तिज्जो भी कुछ खाणा मिलै
पैसे कु:जो कठेरदा।

मदाद कर उ:दी जेहड़ा
जिन्दगीया सधेरदा।
भरोणे नी ढिड्ड मंगतेयां दे
इन्हां मत   गझे:रदा।

हाक्खीं खोप्पु चाह्ड़ी झोट्टा
को:ह्लुए घुमेरदा।
माँ:ह्णु जे चढ़ाई चल्यो
कोई नी पतरेरदा।

कुण कदे:  शिवां पर
दुद्धाँ तू मधेरदा।
विळखा दे बच्चे भुक्खे
तिन्हां कैं:ह् तरसेरदा।

झळस्होया हिरखैं नै अग्गैं
होर भी जळेरदा।
पप्पू अद्धा माँ:ह्णु अप्पू
दूआ मोदी बकळेरदा।
**
तेजकुमार सेठी।