Wednesday 30 May 2018

ग़ज़ल

प्हाड़ी ग़ज़ल।

बगते पर

इक कोशिश।



***

ताज बगते दा कुसी  माफ नीं करदा कदी

जाळ लकीरां दा नी मत्थे ते उतरदा कदी ।

***

राम भटके बणैं-बण भर्त जेह्या राजा कदी

रावणैं गैं था क्या नी  सै:  नी मरदा कदी।

***

छाळ समुन्दरैं परैं  हड़्मान  भरदा कदी।

बगत ही ता था पाणीयैं टोह्ल तरदा कदी।

***

रोज रोज नि मरदा जीणे अपणे दे तिंयैं

खरा हुँदा  जे देस्से  तियैं  मरदा कदी।

***

हाख वगदी हटी नी  चोट रत्ती भर ही थी

हस्सी मळदा पीड़ा हिम्मत करदा कदी।

***

डा:डा हुंगा वगत तां  रैंह्दा रहो अपणे घरैं

डाँग बजगी ताँ बजणा दैं, मैं  नीं डरदा कदी।

***

सैंकड़े औतार ज्हाराँ संत  आये कवी

माह्णू  सुधरेया नि फिरी भी लुभदा कदी।

***

चोट बाह्यै ऐब्बी,  तोप्पै तिसते इ रमान

फट्टाँ बगते देयाँ जो बगत ही भरदा कदी।

***

चुकणे ही हन तां झोळी-चक्काँ जो चुक्क,

झोळी-चक दिक्खया नी कम्म करदा कदी।

***

लोक हटदे नीं सराह्न्दे  प्हाड़ां बर्फां देयाँ

जीभ सतरोन्दी प्हाड़ सैह्यी  खरदा कदी।

***

होऐ मूह्न्दा ता भी भरोह्या लगदा घड़ा

घुआड़ी नै बगते जो कुण दिखदा कदी।

***

तेज सेठी।

श्यामनगर, धर्मशाला। (हि o प्र o)

No comments: