Tuesday 31 January 2017

जान्नी जो जिस्म  भौंयें था  छळदा रेह्या फिरी
सुपना भी कोई हाक्खीं च पळदा रेह्या फिरी।
**
होया  मैं गच्च इतणा कि सुपने दी चाह्णिया
हाक्खीं घुआड़ने ते भी टळदा रेह्या फिरी।
**
सुआस्साँ दे खाते मुकणे दा नोटस मिली गेया
आस्सा दा दीया तां भी बळदा रेह्या फिरी।

सेक्के नि हड्ड-गोड्डे थे  धुप्पा मैं  चोंधिया
ध्याड़ा घरोया हत्थ ता मळदा रेह्या फिरी।
**
लग्गी नी अप्पूँ अग्ग एह किह्ल्ले इ ठेलुएँ
संगती च घैन्नेयाँ दिया  बळदा रेह्या फिरी।
**
लाया मैं अपणे अँगणे च बूटा सचाइया दा
फुल्लेया ता देरिया ते   फळदा रेह्या फिरी।
**
कित्ता था द्रोह मैं ही, मित्तर ता था साफ़ दिल
करना सै तिसदा  माफ़ भी  खळदा रेह्या फिरी।
**
छल्लियाँ दी रोटी सागे  नै प्रौह्णे इ झप्फी गै
मिंजो तियें ता खाणे जो प्ह्ळदा रेह्या फिरी
**
मिह्णती दा मैल भरेया मैं सबराँ दे गत्तां विच्च
सज्जणा दी सेजळु कनैं गळदा रेह्या फिरी।
**
अद्धी ता दुनियादारी सम्हाळी लई  चूह्याँ
लिक्खी पढ़ी सैह बिल्लियाँ जो सळदा रेह्या फिरी।
 **
विचळेरी छड्डेया माह्णु , इन्हां टोपियाँ जनाब
डरदा जे बूट बिठरेया  दळदा रेह्या फिरी।
**
मुद्दे दा हल निं चाह्यी दा मुद्दा ही चाह्यी दा
चुक्केया जे मीडियें सै’ उछळदा रेह्या फिरी।
 **
द्वेस्से दे खड़पैं डस्सेया बैद्दे ड्याणी जंघ?
डळ्याह सैह् इ ठाकर डह्ळदा रेह्या फिरी
**
दुध पाणिये दा मेळ ता ढिडे ते दोस्ती
पा भर था जित्थु सेर भी रळदा रेह्या फिरी
**
हाक्खीं च रात कड्ढी तेरीया निहाळपा च
दिन  जुग लग्गा मैं हाक्खीं जो मळदा रेह्या फिरी।
**
अप्पी तपी  ध्याड़ें ऐ दुनिया जो दित्ता जीण
रोई नि हाक्ख कोई जे ढळदा रेह्या फिरी।
**

No comments: