गोह् ई गाळी

किस्मत कर्मां जै:ह्रां आळी
क्या कढै डळया:ह् दी डाळी।
**
तां:ह्गां देयाँ तंदां कोई
सच्चा जोग्गी कड्ढै ताळी।
**
जां फिरि अप्पू भुगती रोई
कढ्णे पौणे गुआळी गुआळी।
**
बौ:हल्दां जो जुतणा ई पौणा
प्रैणी लेई नै कुद्देया हाळी।
**
पिट्ठी जुंंगड़ा मूँहैं छिकड़ा
धरत पटणी ह्यी नी सुखाळी।
**
गुरमत गुरुएं देह्यी सखाळी
कित्ती उम्रां तिक्क जुगाळी।
**
चण्डी चण्डी मेरे गुरुएं
गुच्चुम्यां कस्टां दीया आळी।
**
पसु पसु राय:ह्यीय्या पास्सैं
पसुपति मेरा दित्ता उट्ठाळी।
**
ध्याड़ा चढ़ै न घरोयै एत्थू
अट्ठों पै:ह्र ल:ह्ग्गीय्यो दियाळी।
*
जाह्लू कोई लोभी बद्दल
बह्रना ळ:ग्गन धुत्तर धाळी।
**
ज्ञाने दे मैं घियान्ने वाळी
दित्ते काळे बद्दल टाळी।
**
मेरी भाणी गप्पाहड़ जाणी
मितरां दित्ती गल्ल उछाळी।
**
तिन्हां ई मितरां चुप्पीया कित्ते
गुरुएं मू:ह्रैं सीट सम्हाळी।
**
होर कोई हुन्दा मेरीया ठा:ह्री
तां सै:  दिंन्दा खू:ह्यें छाळी।
**
दोस  नी देणा मेरे मित्तर
गि:ह्ज्ज्यो थे न्हेरे दीया राह्ळी।
**
दिक्खी नै सोहणे जेह फुल्ले
मत करदा मुंडणे दी का:ह्ली।
**
इक्क तां तीनि मुर्झाई जाणा
दूआ सुन्नी रै:ह्णी डाळी।
**
जोरावरीया पैंठी व्ह्याळी
तैं तां बोटिया 'गोह् ई गाळी'।
**
होर्नां जो भरी भरी प्री:ह्ये
मुंज्जो अद्ध प्री:हत्ती थाळी।
**